اللغة الصينية ولعبة الكتامينو (Katamino)

وصلتنا لعبة جديدة من فترة بسيطة ومعاها الكتالوج بتاعها باللغة الصينية

جنى: ماما ممكن تقرأيلي مكتوب إيه

أنا: إيه ده.. لا ما أعرفش

جنى: أرجوكِ أرجوكِ

أنا: يا حبيبتي دي باللغة الصينية وأنا ما اتعلمتهاش

.....

تاني يوم

جنى: ممكن تقوليلي مكتوب ايه

أنا: ياجنى دا بالصيني وأنا والله مااعرف ولا حرف فيها

جنى: ليه؟!

أنا: يا جنى أنا مادرستهاش قبل كده فمااعرفهاش خالص

جنى: طيب إيه رأيك نسأل عمو جوجل 😂

أنا: جوجل!! (أنا اللي جبته لنفسي لما بنحث عن حاجة باستخدمه وهي عارفة إنه بيطلع كل حاجة) .. طيب ماشي إن شاء الله

...

وتعدي الأيام وهي عمالة تزن.. ولما يأست مني.. لقيتها جاية تقوللي في مرة: شوفي أنا كتبت إيه .. ولقيتها كاتبة الورقة اللي ف الصورة.. قلتلها: إيه ده!

قالت: أنا جبت الكتاب وكتبت زيه. أقولك مكتوب إيه 😂

أنا: انتي عرفتي مكتوب ايه إزاي؟!

جنى: أيوة عرفت من نفسي.. وعارفة الشكل ده (وشاورت على شكل) دا حرف الشين 😂

أنا: الشين! وعرفتي إزاي؟

جنى: أنا عرفت لوحدي 😂😂

---------

يبدو إني هاروح اتعلم صيني عشان خاطرها 😂😂

-----------

طيب المهم عشان البوست بقى يبقى له لازمة.. اللعبة دي اسمها Katamino وهي لعبة جميلة جدًا وممتعة جدًا من ألعاب العقل.. تنمي الذكاء والإدراك البصري والتركيز

ألعاب الذكاء وتنمية الإدراك البصري من هذا النوع كتيرة جدا زي اللعبة دي وزي التانجرام وزي لعبة حرف T (أو هاي كيو) وغيرهم وأشكالهم وأنواعهم مختلفة..

قد تكون بعض الألعاب سعرها عالي شوية.. وقد ترى بعض الأمهات إن الألعاب دي مالهاش لازمة.. وإنها تعلمه يقرأ ويكتب أحسن.. أو تشتري بتمنهم أكل أو ملابس..

لكن أنا شايفة إن الألعاب دي حتى لو غالية أفضل من الملابس الغالية اللي احنا بنشتريها.. واللعب بها أفضل من تعلم القراءة والكتابة>> لأن الألعاب دي بتطور مهارات الانتباه والإدراك والتركيز والتفكير >> اللي الطفل بعد كده بيحتاجهم في التعلم الأكاديمي والتحصيل الدراسي

لو حضرتك مهتمة بتفوق طفلك وسرعة تحصيله فيما بعد لازم تنمي المهارات دي وهو لسه صغير عشان بعد كده ما تشتكيش من قلة تركيزه وعدم انتباهه

ودمتم بخير